Бағдод туманидаги Агротехнологиялар техникумида 2024/2025 ўқув йилининг 871 нафар битирувчиси учун эсда қоларли тантана — диплом топшириш маросими бўлиб ўтди. Тадбир Ватанимиз мадҳияси янграши билан бошланди ва юксак руҳда ўтди. Техникум директори Равшанбек Жалолов, маҳалла бўлими масъуллари, меҳнат фахрийлари ҳамда кенг жамоатчилик вакиллари сўзга чиқиб битирувчи-ёшларга келгуси фаолиятларида муваффақият ва омад тиладилар. Айтиш жоиз, битирувчилар бугун ҳаётнинг турли соҳаларида фаол иштирок этмоқда. Уларнинг айримлари ўз бизнес ғояларини амалга ошириб улгуришган. Шунингдек, 8 нафар ёш техникумни имтиёзли “қизил диплом” билан якунлаб, юксак натижаларга эришди. Битирувчилар эса тадбирда ўз табрик сўзларини инглиз тилида сўзлаб, барчада катта таассурот қолдирдилар. Битирувчиларга дипломлар, намунали тарбияси учун эътироф этилган ота-оналарга эса техникум маъмурияти томонидан ташаккурномалар тантанали равишда топширилди.